ربـاعيّـات جـاهيـن

ربـاعيّـات جـاهيـن

ورد في ورق سلوفان يا حلوة اهديلك؟
والا انقله بالطين في الشتلة واجيلك
الأولاني لو وحى بحناني
عجبي على التاني بإيه يوحيلك
عجبي
*******
ماانتاش بتلعب ليه يا روح بابا؟
ولا عسكري ولا لص في عصابة؟
إلعب أسد أو ديب رهيب أو غزال
دي الدنيا في نهاية المطاف غابة
عجبي
*******
الموج تلول تهبط وتطلع تلول
يا بحر خدني الشط صاحبك ملول
ولاّ بلاش الشط.. ح اعمل به إيه
ده ريحته طحلب مهري وام الخلول
عجبي
*******
أنا قلبي كوكب وانطلق في المدار
حواليكي يامحبوبتي يانور ونار
يلف مهما يلف مابيكتفيش
وتملّي نصه ليل ونصه نهار
عجبي
*******
الأرض شوك أيوه لكين هايش
والحمرة مش يعني الطريق حايش
دي دمنا السيال.. وبشرة خير
ان انتي عايشة وان كنت أنا عايش
عجبي
*******
إيه اللي خدته من مرور السنين
يا قلبي.. الا دمعتك والنيين
بتئن وترجع وبتفرح وترجع تحن
مع إن مش كل البشر فرحانين
عجبي
*******
عيني رأت مخلوق في غاية البشاعة
أنا قلت له لما تأملته ساعة
اللذه والموت علموك اللزج
و انا علموني الفلسفة والشجاعة
عجبي
*******
علقت في المسمار قناع مهزلة
ومعاه قناع مأساة بحزنه ابتلا
بصيت لقيتهم يشبهوا بعضهم
واهو ده العجب يا ولاد والاّ فلا
عجبي
*******
لولا اختلاف الرأي يا محترم
لولا الزلطتين مالوقود انضرم
و لولا فرعين ليف سوا مخاليف
كان بينّا حبل الود كيف اتبرم؟
عجبي
*******
اوقات أفوق ويحل عني غبايا
واشعر كأني فهمت كل الخبايا
وافتح شفايفي علشان اقول الدرر
ما أقولش غير حبة غزل في الصبايا
عجبي*******