قطتين في العشة

قطتين في العشة

النهاردة هحكيلكوا قصة حقيقية حصلتلي سمعتها بعنيا الإثنين في شارعنا ومحتاج منكم حل ضروري، كان في قط بلدي مشهور قوي في شارعنا مفيش قط في شارعنا يقدر يتكلم معاه نص كلمة، وكان في قط تاني أفرنجي كل قطط الشارع بتموت فيه إكمنه حليوه وعنيه ملونه، أفرنجي بقي.

وأنا واقف في البلكونة إتقابل القطين في قلب الشارع فأنا قلت في عقل بالي أكيد هيتخانقوا عشان بيقطعوا علي بعض في القزز (مزز بس بلغة القطط)، لكن ما أدهشنى أن لقائهما كان في منتهي الود وحافل بالأحضان والقبلات، وبدا أنهم صديقين قديمين وكان حوارهم مجرد استرجاع لذكريات الماضي، واكتشفت من الحوار معلومات خطيرة أثارت أعصابي، وكان الحوار كالأتي:

القط البلدي: عامل ايه ماكس؟

القط الأفرنجي: طيب الحال يا ميشو.

ميشو: أنت لسة فيك العادة المهببة دي.

ماكس: إنها لغتي الأم ومتمسك بها حتى لا تنقرض ياصديقي.

ميشو: مهو بسبب تمسكك بلغتك دي كنت بتضيع مننا القزز، مكنتش روش كدة وتقول كلام يعجبهم.

ماكس: لماذا ياصديقي ألا تتذكر عندما كنا نُغازل القطط في الشارع، كنا لانترك قطة تسير في طمئنينة حتي نُغازلها.

ضحكة عالية من ميشو هزت أرجاء المكان ثم قال: ااااه كانت أيام وفاكر لما مسكنا القزة بوسي في العشة كان حتت يوم.

ماكس: نعم ياصديقي ولكني حذرتك في هذا اليوم من الوقوع في الرذيلة مع هذه القزة، لأن هذه القزة من سلالة نادرة من القطط وأسرتها كبيرة ولديها نفوذ ومن الممكن إيذائنا.

قضب ميشو حاجبية وقال بغضب: علي روحهم ياعم ماكس احنا كمان جامدين قوي وميهمناش حد، وقلتلكنخطف فرختين من العشة هيتلهوا في الفرختين اللي ضاعوا وينسوا الموضوع.

ماكس: بالفعل ياميشو هذا هو الذي تم بالفعل وساعدتك فيه، ولكني لا أفضل الإغتصاب لإنه موضوع يفتح من وقت لأخر ولا يموت أبداً.

ثم تسألا عن أحوال بعضهما وتعانقا ثم انصرفا، بصراحة أنا لما سمعت الكلام ثارت أعصابي والدم جري في عروقي وجريت علي المطبخ عشان أجيب السكينة وأنزل أسيح دمهم هما الإثنين طب ميشو قط صايع وممكن أتوقع أي شئ منه إنما ماكس اللي كنت فاكره ابن ناس مقطقطين طلع بالأخلاق دي، وطبعا عارفين إنى متدين بالفطرة إستغفرت ربنا وسيبت السكينة وجريت علي الشيخ بتاعي وبعد صلاة العشاء حكتله القصة وطلبت منه النصيحة في قطتى التي أختفت بعد هذا اليوم المشئوم، وكانت تكسوها علامات الحزن والسكوت وظننتها حزينة علي ما حدث في الفراخ وسرقتها، وكنت أتساءل عن ماذا حدث لقطتي هل انحرفت أم انتحرت أم تشردت في الشوارع، أنها قطة ملهاش في لغة العوءدي، كانت أحلي قطة في المنطقة وكنت بحميها بأيديا وبسرحلها شعرها الأبيض وبلبسها فيونكة حمرا حول رقبتها، فسألت الشيخ ماذا أفعل هل أقتلهما أم أحبسهما حتي يموتوا جوعاً جزاءاً لهما، فرد علي في هذا الموضوع الخطير فقال لي: اللهم صلي علي سيدنا محمد وعلي آله صحبه وسلم أما بعد الموضوع يتلخص يا بني في أن هذه القطة تم إغتصابها من حيوان يشبها وسرقة دجاجك، ولا يوجد في الدين أي عقاب للحيوانات علي جرائمهم، ولكني أحذرك يابنى من حبسهما فأذكر أن في الحديث الشريف إمرأة دخلت النار في هرة حبستها.

فقلت له: عندك حق ياعم الشيخ أنا لن أحبسهما لكن مفيش أي حل تاني لعقابهما.

قال لي: يابني لا تلومن الجاهل علي جهله، فأنت من جعلت هذه القطة متبرجة ومحط أنظار الجميع بشرائطها المثيرة وهذا القط مجرد حيوان لايستطيع التحكم في غرائزة، فأستعوض الله في قطتك ودجاجك وإن كنت صاحب حق سيعوضك الله خيراً إن شاء الله.

فرددت بعصبية مفرطة: إزاي ياعم الشيخ البلد دي فيها قانون ومش ممكن يعملوا عملتهم واسيبهم يهربوا بعملتهم.

فرد علي عم الشيخ وقال: طب جيلي ليه يا أستاذ محمد دي مسألة قانونية أنا مليش دعوة بيها، ولكني أذكرك بتقوي الله.

فتركت الشيخ وخرجت من الجامع واسودت الدنيا أمام عيني ماذا أفعل هل سأستسلم بمنتهي السهولة وتذكرت أن أستشير أختى المحامية عن الحل القانوني لهذه المشكلة فأتصلت بها سريعاً، وقصصت عليها القصة كلها فقالت: بص ياحج محمد دلوقتي في معضلة قانونية أنت مدنى ولو رفعت قضية هترفعها في محكمة القضاء المدني لو كان المدعي عليه مدني زيك، أما لو بوسي اللي هترفع القضية هترفعها في محكمة القضاء القططي، ومفيش قانون أو نص قانوني يجيز ليك أنك ترفع قضية علي قطة، ومش لاقي بوسي عشانتقدر تقنعها ترفع عليهم قضية في محكمة القضاء القططي.

فسألتها هل هناك أي ثغرة قانونية تجيز لي تحريك الدعوي، فقالت لي: مينفعش بالتأكيد سترفض الدعوي.

بهذا غلقت كل أبواب الحلول الممكنة أمام عيني، ولا أستطيع أن أجد أي حل لهذه المشكلة فأرجوا إلي أن أذا أستطاع أحد أن يجد لي مساعدة لحل هذه المشكلة ولن يجد مني إلا شكري وتقديري ..

by ‎Mohamed ع Abdel Hamed‎ (Notes) on Monday, 18 March 2013 at 10:16