التنكيت والتبكيت

التنكيت والتبكيت

بقولكوا ايه بقي اللي حاصل في البلد اليومين دول ولا عايز لغة عربية ولابتاع دا حتي مش محتاج لغة عامية دا عايز لغة من اللغات السوقية اللي بتتقال في الحارات المصرية كمان، الواحد خلاص قرب يشق هدومة من اللي حاصل.

يطلعلي وزير يقولي اصل هما اللي قالولي اقول كدة، ورئيس وزراء يقول للستات نضفوا صدوركوا قبل الرضاعة، ورئيس دولة يطلع يقول في الحارة المزنوقة، طب بزمتك دي تصريحات الواحد يعلق عليها باللغة العربية ويعمل فيها مثقف، وياريت جت علي دول بس دا الاعلاميين برضوا ضربهم السلك وبقوا يقولوا كلام غريب "وزير الحلمات" و"مهيسين فشخ" و"يا عبد المجيد" و"كلام الليل مدهون بزبدة" وفي كلام غريب تاني بيتقال بس حيائي يمنعني اذكرها، حتى ضيوفهم ناس غريبة عجيبة متعرفش جيبنهم منين، زي الأهبل ابن نوال اللي فاكر نفسه شئ مهم وهو نكرة ومبيهتمش بكلامه غير الموتورين اللي معاهم شهادة معاملة أطفال وبصراحة العيب مش عليه العيب علي اللي جابه وعملوا قيمة، دا حتي البوب ياراجل لسع هو راخر وتويتاته بقت فيها حاجات غريبة مرة أساحبي ومرة شعب متخلف بحس كدة أنو ساعات بيضرب معلش أصل الضغط عليه كتير ولاد مبارك بيشتموا، وولاد العسكر بيشتموا، وولاد الخرفان بيشتموا، وولاد الحرام قابضين منهم وبيشتموا برضوا خلاص ممكن نعديلوا الحتّتين دول، ربنا يستر علي حمدين ويكملوا بعقله.

بس كل الناس دي بصراحة متهمنيش ولايفرقوا معايا ببصلة ولا بيقروا كلامي اصلا كل اللي يهمني الشباب الحلو الظريف اللي قاعد ليل ونهار عل الفيس بوك وتويتر اللي هو اصلا جاي من التوتر مش عارف بتستحملوه ازاي، ما عليكوا نخش بقي في موضوعنا أقسم بالله العظيم وحياة أغلي حاجة عندكوا أنا ماشفت ولا أعتقد أني هشوف أخف من دم المصريين بس أبوس أيديكوا ومستعد أبوس أي حاجة تختاروها بطلوا نكت كفاية بقي مش عشان بايخة والله بس كتر النكت دي بينتنا أننا شعب أهبل مش عارف يأخد موقف إيجابي ولاتغيير ولابتاع، أي قرار وقانون يطلع مش بعرفة أساسا بس بستنبطة من النكت (فاهمين استنبطة دي عل العموم أنا مش هعرف أشرحها هي حاجة كده عاملة زي أعرف الموضوع من النكت)، كلوا نكت نكت مفيش شتيمة دا حتي ياراجل أول ما طلع قرار منح الضبطية القضائية للمواطنين وأقل واحد قال عليه أنو قرار خراب الدولة وهيئدي لحرب أهلية أنا قلت بقي الناس هتزلزل الزلازيل وتعمل اللالي عشان القرار بتاع النائب الملاكي دا يتلغي ألاقي الشباب قاعدة تهزر وتتريق عل القرار وتقول أنا بأييد القرار عشان هيخلينا نأفـّش براحتنا في الشارع اه ياولاد الصايعة هو دا اللي همكوا صحيح الشيطان شاطر بس مش كدة يعني، أنا عارف أن المسؤلين كلهم مشكوك في قواهم العقلية وأقصي شئ يقدروا يعملوه بالعافية كمان أنهم يديروا حضانة للأطفال وتصريحاتهم هي لوحدها كوميدية بس عايزين نعمل حاجة مفيدة هي المظاهرات صحيح مبتعملش انجاز فعلي نظرا لحالة الطناش الرئاسي فعايزين شاب ابن حلال يفكرلنا في فكيرة جديدة يمكن نعرف نجيب بيها حقوقنا بدل حالة التنكيت اللي صابتنا دي ونبكت ونّكد علي الحكومة بدل ماهي واخدانا ملطشة وكفاية علينا باسم يوم الجمعة، ولعله خير إن شاء الله.

by ‎Mohamed ع Abdel Hamed‎ (Notes) on Wednesday, 13 March 2013 at 12:34